candlelight.jpeg

O tausaga uma ‘e iai se sauniga fa’apitoa e fa’amanatuina ai soifua ‘o i latou ua maliliu ma ‘afaina o latou soifua i sauāga. O le tama’ita’i iā Susana Remerata Blackwell, o lona alo iā Kristine, o le tama’ita’i iā Phoebe Dizon ma le tama’ita’i iā Veronica Laureta. O latou nei sa maliliu i se fa’alavelave sa tupu i le fale fa’amasino i King County i le 1995. Lea sa fasiotia ai e le to’alua fa’aipoipo o le tama’ita’i iā Susana i latou, ina ua finagalo Susana o le a tatalaina le la fa’aipoipoga ma tete’a ma lona to’alua ona ua tele lona sauā ia te ia. Ua avea lenei fa’alavelave sa tupu, ma mafua’aga ua fa’atūina ai lenei fa’alapotopotoga o le API Chaya lea sa fa’aigoina i le amataga “O le maota o sulufa’iga mo Tinā ma Tama’ita’i o le atu Asia ma le Pasifika” (Asian & Pacific Islander Women & Family Safety Center and Chaya). E ui ina ua 20 tausaga talu ona tupu lenei fa’alavelave, o lo’o mātauina pea le fa’atupula’ia o nei sauāga e o’o lava i le asō. O le manulautī o lenei fa’alapotopotoga ina ia saunia se nofoaga saogalemu mo ē na a’afia, e fa’asoaa’i ai manatu ma galueaga fa’amalosi’au ina ia puipuia mai i latou mai sauāga ma fausia ai se lumana’i manuia.